السلام عليكم ورحمة الله وبركاتة
رجعت تانى ومش عارف أقول أيه
الصيف دخل والدنيا حر قووووووووى
وقلت يا واد خذ مراتك والولد ( كوكو) وعلى أسكندرية وغير جو
المهم فتحت اللاب توب وعملت تحليل سريع للرحله
دخول بكام ( فى سرك ربنا يستر )
أستوب كام ( أنتو عارفين الخروج مع العيله مالوش أمان زى السوق بالضبط )
هدف كام
( خسارة هنا طبعاً بس على قلبى زى العسل)
توكلت على الله
وجهزت ( جى جى ) السيارة بتاعتى معلش بحب أدلعها
وفى محطة البنزين وقفت كتير قوى أمام عداد الطلمبة
معرفش ليه فكرنى بالمجنون وهو بيجرى
والله نسيت نفسى وأصبنى أحباط رهيب
خصوصاً مع العدادات الديجتال ديه تحس أنك فى صفقة
حصلى صدمة ووقفت العداد
هاهاهاهاهاها
أشم نفسى شويه خلاص الأعصاب بقت هباب
أه كله غرامة أستر يا رب
مراتى كانت بتجهز السندوتشات والبيبس والشيبس لزوم السكه لازم تدلعنى شويه ماهو خلاص هى أقتنعت أن أيامى معدوده فى الدنيا من ساعة ما دخلت الفوركس جميع الأمراض الفوركسية زارتى بس الحمد لله أهم حاجه لسه ما تأثرتش هى مش ناقصه فضايح هاهاهاهاهاها 
المهم ركبنا ( جى جى ) ولبست النظارة وعملت فيها مهم وعلى الصحراوى وأديها يا معلم الحمد لله كل عدادات السيارة معطلها فى سركم أى أرقام بتتحرك أمام بتصبنى بالأحباط بس طبعاً للأمان كل مبينات الأنذار شغاله فوركسجى حريص هاهاهاهاها عارفين أنا نفسى أركب شاشة ( LCD ) فى السيارة واوصلها بالموبيل على الفوركس تبقى حكاية والله قريب أدلع ( جى جى ) وأظبتها أن شاء الله المهم أنا نسيت أقول ليكم أن هدفى الأساسى من الرحله دية
الحصول على ( أستراتجية الولد كوكو )
الزباله عاوز يبيع لى الإستراتجية بـ 1000$
وزياده فى المصروف مدى الحياه
أنا مش عارف الولد الزبالة ده طالع لمين
( مع أحترامى لكوكو طبعاً )
على أول الصحراوى شفت الأهرام بالضبط على شكل موجات أليوت من جميع الأتجاهات عاملين 3 هاى بالتمام يعنى موجه خماسية سبحان الله والله أنا حاسس أن أليوت ده زار مصر وشاف الهرم وأخترع نظريته العظيمه ديه وأحنا هنا من 3000 سنه فى البنج نروح نركب خيل وخلاص هاهاهاهاهاها ــــــــــــــــــــــــــــــــــــــــــــــــــ ـــــــــــــــــــــــــــــــــــــ فى الكيلو 50 كمين الرخص يا باشا ليه أنت ماشى على 150 كم/ ساعه 500 جنية غرامة من أولها حـــــــــرام بصراحه أنا كنت حاطط أستوب على 2000 جنية للرحله كده قررت أشتغل بالتريلينج أستوب ربنا يستر والأسبوع يعدى من غير مارجن كول 
الإدارة الحاسمه هى سر النجاح هاهاهاهاها طبعاً حاولت أفوت كومشن لأمين الشرطة لكن تقول أيه الراجل يظهر مش عامل ( أى بى ) رأسة وألف سيف ياخد الأسبيرد كله هاهاهاهاها وصلنا الحمد لله
أسكندرية
يا سلام على أسكندرية
وهواها
بالدنيا والله
روحك ترجعلك كده وأنت بتشم ريحت بحرها
وتمشى على الكورنيش
يتبع